Akanfoɔ ntoma din ahodoϽ binom ho mpɛnsɛmpɛnsɛmu a ɛgyina Mɔfɔlɔgyi ne Sentase nhyehyɛeɛ so

Abstract

Dwumadie a nhwehwεmu yi die ne sɛ ɛhwehwɛ Akan ntoma din ahodoɔ binom mu wɔ mɔfɔlɔgyi ne sentase akwan so. Nhwehwεmu dwumadie yi gyinaa botaeε ahodoɔ mmiεnsa so. Ɛmu baako ne sε, εbɛma yεahunu Akanfoɔ ntoma binom din abɔseε. Bio, εbɛma yεahunu ɔkasamu nhyehyεeε ahodoɔ a εwowɔ ntoma din mu. Ne korakora no, εbɛma yεahunu akwan ahodoɔ binom a yεbεtumi afa so abɔ yεn ntoma ahodoɔ ho ban. Nkyerεkyerεmu Akwankyerε so na ɔhwehwεmufoɔ no gyinaeɛ de yεɛ ne nsεmmoano ahodoɔ no mu mpεnsεmpεnsεmu. Ɔhwehwεmufoɔ no nam botaeε pɔtee (nyiyimu) so na ɛnyaa nsεmmoano ahodoɔ firii nnipa binom ne nwoma ahodoɔ binom mu de yεε ne dwumadie yi mu nhwehwεmu. Nhwehwεmu dwumadie no baa awieeε no, ɛmaa yɛhunuu no pefee sε ntomatɔnfoɔ ne ntoma nnwumakuo ahodoɔ no nam nsεmfua abɔseε ahodoɔ so nya din ma ntoma ahodoɔ. Bio kasamu tiawa, ɔkasamu mmɔho, ɔkasamu kuntann ne sentase dwumadie ahodoɔ a ntoma din tumi die da adi nso. Saa kasamu ahodoɔ yi mu bi tumi di dwuma sε asεnka, ɔhyε anaa asεmmisa. Nhwehwεmu no da no adi sε, ntoma din no nyinaa di dwuma sε edin asɛm wɔ sentase dwumadie nyinaa wɔ kasamu mu. Ɛsiane da no adi sε ntoma din no mu bi wɔ hɔ a wɔatwitwa so sεdeε εbεyε na ne ka nyε den. Bio, sɛ ntoma foforɔ bi ba dwa so a, Akanfoɔ de edin a ɛkura nsɛmfua mmienu anaa kasamu tiawa na ɛbɛto soɔ.