Akanfo kommyɛ ho mpɛnsɛmpɛnsɛm wɔ sohyio-pragmatek kwan so

Abstract

Nhwehwεm a εfa kommyε ho anamɔntu yε ade a εwɔ fam, εmfa ho sε animdefo binom atu ho anamɔn, ne titiriw ne ɔman Ghana mu. Nhwehwεm yi botae a esi n’ani so ne sε εbεhwε ada nkyerεase ahorow a kommyε de puem wɔ nkitahodi ahorow a εkɔ so wɔ Akanfo asetena mu ne εho nsunsuanso. Nhwehwεm no nam sohyio-pragmateke kwan so de hwehwεε nkyerεkyerεm ahorow fa kommyε a εda adi bere nkitahodi bi rekɔ so. Nhwehwεm no kɔɔ so wɔ Nkawkaw a εwɔ Kwahu-Atɔe mansin no mu. Nhwehwεmfo no nam ahwεe ne nkɔmmɔtwetwe kwan so na ɔde pεε mmoanosεm fii mmea ne mmarima du nkyεn. Miyiyii nnipa a minyaa wɔn nkyεn mmoanosεm no biara kwan so a anhyε da anni nhyehyεe biara so, na menam kwaletetif kwan so na mede yεε mmoanosεm no mpεnsεmpεnsεm. Miyii mmeae ahorow no bi wɔ Akanfo asetena mu a mpεn pii wɔda kommyε nneyεe no adi; asɔre, ahemfi, sukuu, aban asεnnibea, na mesan nso ne ankorεankorε binom twetwee nkɔmmɔ faa wɔn suahu a wɔwɔ fa kommyε ho. Nhwehwεm no akyi no εdaa adi sε kommyε kasa, na εwɔ ne nsunsuanso a εde ba wɔ Akanfo asetena mu. Kommyε nkyerεase a εde bεba wɔ nkitahodi bi mu no begyina tebea pɔtee a epuee mu no so