Mfantsefo mbԑ na kasambirenyi a ɔfa abɔdam ho mpԑnsampԑnsamu

Abstract

Nhwehwɛmu yi pɛnsampɛnsaam mbɛ na kasambirenyi a Mfantsefo dze kyerɛ abɔdam mu. Ͻnam dɛ nhwehwɛmu yi fa Mfantsefo hɔn adwen na hɔn suahu wͻ abͻdam ho ntsi migyinaa nsɛnkyerɛkyerɛmu do kyerɛɛ me nsɛm mu. Nhwehwԑmu yi dze mbuae a minyae fii hͻn a menye hͻn dzii dwuma no hͻ na nsɛm a minyae fii mbuukuu mu. Dwumadzi yi kͻr do wͻ nkurow ebiasa mu; mekyerԑ Esema, Fijai na Assorku a wɔwɔ Sekunde na Esema Mansin mu wͻ Anee Mantɔw. Nhwehwԑmu yi dze nyiyimu kwan a ogyina botae do paaw nsԑnyianofo anaa nyimpa a medze hͻn dzii dwuma yi. Hͻn a medze hͻn dzii dwuma no yԑ adatserfo been, sunsumsͻr asͻfo beenu, edunsifo na nyimpa mpanyimfo a hͻn mfe akͻ enyim. Nyimpa a medze hͻn dzii dwuma yi dodow yԑ du. Nhwehwԑmu yi yԑ mpԑnsampԑnsamu a ogyina dza nsԑnyianofo no dze too gua do. Nhwehwԑmu yi aboa ma yeehu adwen a Mfantsefo wͻ fa abͻdam ho a ogyina mbԑbusԑm na kasambirenyi a wͻdze dzi dwuma fa abͻdam ho. Mbԑbusԑm a wͻdze dzi dwuma no bi nye ͻbaakofo nnkyer damfo, abͻdam nnyim busuanyi na dza ͻkeka ho. Nhwehwԑmu yi san da no edzi dԑ yԑdze kasambirenyi bi tse dԑ n’ahoma atsew, ne tsir asԑԑ na adze no kasa fa abͻdam ho. Dwumadzi ada no edzi bio dɛ mbɛ na kasambirenyi a Mfantsefo dze kyerɛ abɔdam no wɔ nsԑntsitsir ahorow esia: abɔdam ahyɛse/ farbae, abɔdam ho nsɛnkyerɛdze anaa kɔkɔbɔ, abɔdam ho ayarsa, kwan a wɔnye abɔdamfo fa do na dza ɔkeka ho. Nhwehwɛmu yi bɛyɛ mfaso ama dodowara a wɔpɛ dɛ wotu hɔn nyimdzee wɔ Mfantse kasa ho mpon.