Abstract:
Nhwehwεmu dwumadzi yi no botae nye dε ͻhwɛ adwen si anomoo anaa enyimpi kasa a
afarfo dze dzi dwuma wͻ hͻn daa abrabͻ mu dɛ wͻyɛ Akanfo. Minyaa mboanosɛm wͻ
afarfo hͻ wͻ Mfinimfin Mantͻw mu, mara me nyimdzee a mowͻ wͻ tsir asɛm no ho na
nwoma ahorow mu. Dwumadzi yi kͻr do wͻ mpoano nkurow ebiasa a wͻwͻ Mfinimfin
Mantͻw mu: Simpa, Apaa na Anomabo. Nhwehwεmu yi dze nyiyimu kwan a ogyina botae
do paaw nyimpa a medze hͻn dzii dwuma no. Mefaa afarfo na nantͻmfo eduasa.
Nhwehwɛmu yi dze Brown na Levinson (1987) enyidze adwenmusɛm piaa
mpɛnsampɛnsamu no ekyir. Adwenmusεm yi ada kwan a akasafo binom dua anomoo do
tsiatsia etsiefo binom hͻn enyimpa do. Ɔda edzi dε, akasafo dze dɛm anomoo anaa enyimpi
kasa tsiatsia etsiefo na hͻnara so enyimpa do. Anomoo kasa a dwumadzi yi dze to gua no
gu mu ahorow; dza wͻka tsia basia a ͻyɛ otsiefo, dza wͻka tsia banyin a ͻyɛ otsiefo, dza
wͻka tsia otsiefo ne maame, dza wͻka tsia otsiefo ne papa na enyimpi kasa ahorow a wͻhwɛ
nyimpa n’abͻsu anaa tsebea a ͻwͻ mu ho. Anomoo kasa a afarfo ka no nya nsunsuando wͻ
etsiefo no do. Wͻdze anomoo da hͻn ebufuw edzi na wͻdze ka binom enyim wͻ ber a
wonyim dɛ wͻda suban bͻn bi edzi. Anomoo kasa yi mma enyidze mmba hͻn nkͻmbͻdzi
mu fi mbofra kesi mpanyin do, wonnyi fɛr na ͻma nkorͻfo twe hͻnho fi hͻn nkyɛn osiandɛ
wohu hͻn dɛ wͻyɛ nkorͻfo a wͻmmpͻwee.Dwumadzi yi no botae nye dɛ ͻbͻboa ma afarfo
a wͻwͻ Mfinimfin Mantͻw mu wͻ Ghana bɛbrɛ anomoo kasa a wͻdze dzi nkitaho ase ama
aboa ma nkorͻfo etum atwe abɛn hͻn wͻ bebiara a wͻbͻkͻ.
